Kawani's munisipyo napusilan patay

Gipusil patay ang usa ka lalaki nga kawani sa munisipyo samtang nagsakay sa iyang motorsiklo paingon na mopauli sa ilang pinuy-anan sa Okoy, Santa Fe pasado alas 9 sa gabii niadtong Lunes sa gabii.

Dead on arrival sa Bantayan District Hospital ang biktima nga si Ronelo Cabrera, 29, ulitawo ug nagpuyo sa Talisay sa nahisgutang lungsod ug casual employee sa kagamhanang lokal sa Santa Fe.

Ang mipusil sa biktima mao si Johnny Velliganio Elustrisimo, 24, ulitawo, residente sa Okoy.

Si Cabrera nakaangkon og samad pinusilan sa iyang ulo ug daling gidala sa nahisgutang tambalanan apan nakabsan na kini sa kinabuhi.

Sa gihimong imbestigasyon sa kapolisan sa Santa Fe pinaagi ni SPO1 Felix Escarlan nasayran nga ang biktima nagsakay sa iyang motorsiklo niadtong higayona sa national road paingon sa ilang panimalay.

Apan paghidangat sa maong dapit kalit lang dunay gilabay nga botelya diha sa tunga sa karsada gikan sa mga estambay nga naglingkod sa daplin

Ang biktima nga nakabantay sa naglabay sa botelya nanaog kini sa iyang gisakyang motor ug gikomprontasi ang suspek hangtod nga miresulta sa mainiton nga panaglalis.

Ang suspek kalit lang mibunot og armas nga mobuto diha sa hawak dayong pusil sa biktima tumong sa ulo.

Ang kapolisan nga nakadawat sa maong alarma daling miresponde ug mihimog hot pursuit operation batok sa suspek gipangulohan ni SPO1 Antonio Illiot uban sa iyang duha ka kauban nga miresulta sa pagkasikop sa suspetsado.

Ang suspek nga si Ellustrisimo nakuhaan diha sa iyang posisyon og 38 paltik nga rebolber ug gituohan sa kapolisan nga maoy gigamit sa pagpamusil.

Kasamtangan karong gitanggong ang suspek sulod sa detention cell sa Santa Fe Police Station samtang gihikay na ang tukmang kaso batok kaniya.