Bana naghikog

Bana naghikog gumikan sa hukom sa iyang asawa nga mobalik ngadto sa gawas sa nasud aron manrabaho.

Ang maong insidente nahitabo didto sa residensiya sa biktima nga si Reggie Cua de Guzman, 29, minyo, nagpuyo sa Sitio Locatha, Looc, Lapu-Lapu ug trabahante sa MEPZ 1.

Base sa imbestigasyon ni SPO2 Rolito Jumao-as sa Homicide Section sa Lapu-Lapu nasayran nga nadiskubrehan sa iyang bayaw nga si Ral Lim ang patay'ng lawas ni de Guzman mga alas 5:30 sa milabay'ng hapon.

Nakaplagan kini sulod sa iyang panimalay nga nagbitay gamit ang usa ka nylon nga pisi gihikot sa liog niini.

Matud pa ni Lim nga iyang giduaw ang iyang bayaw kay mao ra kining usa sa ilang panimalay gumikan kay ang asawa niini atua sa China nagtrabaho ug ang anak nga dos anyos tua sa iyang ugangan nanimuyo.

Gihulagway si de Guzman nga hilumon sa iyang mga silingan ug dili kini moinom diin gikan sa trabaho dayong uli sa ilang panimalay.

Gidudahan sa mga silingan ug ni Lim nga kaguol sa sitwasyon sa nagkalagyo nila nga pamilya ug sa dihang miuli ang asawa niini nga si Mary Ann niadtong Sityembre 6 ning tuiga gumikan kay namatay ang amahan niini usa lamang ka semana mibalik dayon kini sa China.

Ang patay'ng lawas ni de Guzman nasuta sa mga imbestigador nga walay foul play sa kamatayon niini apan ipaubos gihapon kini sa autopsy sa kapolisan.