45-anyos nalubaan kritikal sa ospital

Kritikal ang kahimtang sa usa ka tawo kinsa biktima sa pagpanunggab ug ang suspetsado nadakpan sa kapolisan.

Nahitabo kini alas 10 pasado ang takna sa miaging gabii sa Sector 7 sa Pagsabungan, Mandaue.

Ang biktima mao si Armando Paglinawan, 45, minyo ug ang suspetsado mao si Warfe Toling, 35 anyos, minyo nga silingan usab niini sa maong dapit.

Si Amid Laguarda, 30 anyos, minyo nga taga San Remegio, Cebu nga silingan sa biktima maoy nakataho sa kapolisan sa Presinto 3 sa Basak Police Station.

Nadakpan ang suspetsado nila ni PO3 Napoleon Retuya, PO1 Roberto Neri, PO1 Mario Booc ug PO1 Randy Lopez kinsa dali usab nga nakatubag sa maong alarma.

Si PO1 Marlowe Binangbang sa kapolisan sa nahisgotang presinto nga gikahinabi sa Banat News miingon nga naglakaw lang ang biktima pauli gikan nga nag-inom sa usa ka tindahan sa maong dapit.

Ang suspetsado kinsa kalit lang mitumaw sa agianan ang kalit lang mihansak sa gidalang kutsilyo ngadto sa dughan ni Paglinawan.

Gidala ang biktima sa Cortes General Hospital sa maong dakbayan ug human sa pasiunang pagtambal kini gibalhin sa Vicente Sotto Memorial Medical Center.