Gani gibutyag ni Osmeña nga siya gihapon ang motudlo og mga sakop sa board sa MCWD hulip nila ni Atty. Rico Tautho ug Ruben dela Cerna nga mapupos na ang termino sa Disyembre 31.
Atol sa press conference sa mayor kagahapon sa udto gipahibalo niini ang duha ka mga personalidad nga iyahang itudlo pagka sakop sa board sa MCWD hulip nila ni Tautho ug dela Cerna ug kini mao sila si Atty. Chito Teleron nga molupyo sa Talisay ug Engr. Leo Pacaña.
Ang mga sakop sa Integrated Bar of the Philippines (IBP)-Cebu Chapter maoy mirekomendar kang Atty. Teleron ngadto sa mayor aron masakop sa MCWD board ug ang Chinesse Chamber of Commerce and Industry maoy mirekomendar kang Pacaña nga retiradong mechanical engineer sa usa ka dakong kompaniya didto sa Amerika, ang Alaska Pipeline.
Wala hatagi og gibug-aton ni Osmeña ang lakang nila ni Mandaue City Mayor Thadeo Ouano, Talisay City Mayor Socrates Fernandez, Consolacion Mayor Avelino Gungob, Lapu-Lapu City Vice Mayor Norma Patalingjug ug Cordova Vice Mayor Danilo Sinugbuhan nga misuwat ngadto kang Garcia pag-awhag niini nga ipursige niini ang katungod sa pagtudlo og mga sakop sa board sa MCWD.