Masuso nadat-ogan sa amahan, patay

Patay ang usa ka batang lima pa lang ka adlaw sukad sa pagkatawo human kini madat-ogi sa iyang amahan nga natulog didto sa Maslog, Danao sa milabay'ng adlaw.

Ang biktima mao si Ronabel Aguilar, 5 ka adlaw gikan natawo, usa sa kaluha nga anak sa magtiayong Roldan ug Maybel nga nagpuyo sa maong dapit.

Base sa imbestigasyon ni PO3 Glen Manulat sa Danao Police Station nasuta nga ang kamatayon sa bata gumikan sa pagdat-og ni Roldan sa iyang bukton ngadto sa nawong sa bata.

Gituohan nga wala na makaginhawa ang bata sa iyang pagkatulog gumikan sa bukton sa amahan niini nga midat-og ngadto sa nawong niini samtang nangatulog uban sa iyang inahan ug ang kaluha niining si Ronamay.

Matud pa ni Roldan Aguilar nga nahinabi sa Banat News nga wala niya tuyoa ang maong panghitabo ug wala usab siya makainom og ilimnong makahubog niadtong tungora.

Gumikan lamang sa kakapoy nga iyang gibati hinungdan nga sa daw mantika silang duha sa iyang asawa nga natulog ug pagmata nila mga alas 5:00 sa kaadlawon ila nalang nabatyagan ang bata nga migahi na ang lawas.

Gisuwayan sa pagdala sa magtiayon ang bata sa Danao District Hospital apan gideklarar kini nga dead on arrival sa mga mananambal.

Samtang si Roldan mitahan usab dayon sa Danao Police Station ug kasamtangang mabilanggo sa maong buhatan.

Matud pa ni Roldan nga sakit kaayo ang nahitabong kamatayon sa iyang anak diin siya pa gyud ang hinungdan niini, apan wala siyay mahimo ug andam siya nga moserbisyo sa sala nga iyang nahimo bisan pa ang asawa niini walay plano sa pagpasaka og kaso batok kang Aguilar.