Manila mo-imbestigar sa mga opisyal sa customs

Ang Prosecution Intelligence and Investigation Division (PIID) sa Bureau of Customs maoy giawhag ni Cebu Customs District Collector Ricardo "Boysie" Belmonte nga paimbestigahon sa mga kawani sa customs Cebu nga maoy responsable sa anomalosong pagpagawas sa upat ka luhong sakyanan nga nasakmit usab og balik sa milabay'ng semana.

Si Dick Cariño, chief of staff ni Belmonte, sa pakighinabi sa Banat News miingon nga dako ang ilang pagtuo nga adunay mga dagkong opisyal nga nalambiggit sa maong transaksyon ug dili kini nila palabyon hinungdan nga ang PIID maoy ilang gihangyo nga mohimo sa imbestigasyon sa maong hitabo aron patas ang himuong imbistigasyon.

Hinuon, dili pa ikabutyag ni Cariño kung kinsa ang mga nalambigit niini nga opisyal sa customs apan segurado nga tanang mga giagian sa dokumento maoy manubag sa maong pagpagawas sa duha ka Nissan Terrano, usa ka Mitsubishi Pajero ug usa ka Toyota Celica .

Kahinumduman, sa milabay'ng Miyerkules, ang upat ka sakyanan nakagawas sa Cebu International Port gumikan sa pekeng dokumento nga pulos gipanghulipan ang mga detalye apan sa paningkamot sa Customs Intelligence and Investigation Service-Operation pinanguluhan ni Leonito Santiago nasakmit kini og balik.

Usa sa maong mga sakyanan nassakmit sa kapolisan sa dakbayan sa Lapu-Lapu niadtong milabay'ng Biyernes ug anaa na karon sa kustodiya sa customs Cebu.

Ang maong mga sakyanan nalutsan na kini og warrant of seizure and detention ug nasakmit pabor sa gobyerno ug gitakda na untang isubasta aron kadugangan ang koleksiyon sa adwana sa Sugbo.