Maguwang gitipi sa manghod

Patay ang usa ka construction worker human kini lubaa sa iyang manghod nga una na niyang gikaaway gumikan sa ilang kahubog kagahapon sa kaadlawon diha sa Sapang Komunidad sa Guadalupe ning dakbayan.

Ang biktima nga gidali unta og dala sa Vicente Sotto Memorial Medical Center giilang si Mario Diola Doble,41,apan nakabsan kini sa kinabuhi tungod sa igo sa kutsilyo diha sa iyang tuong dughan ug walang kilid.

Gitumbok nga miunay kaniya mao ang iyang manghod nga usa usab ka construction worker nga si Randy Diola Doble,36, kauban ra sa balay sa biktima diha sa maong dapit.

Sumala pa sa inahan sa duha nga si Arsenia, nianang gabii sa adlaw'ng Sabado nakig-inom ang magsuon sa ilang mga higala ug mga silingan apan dangtang pagka-alas onse sa gabii, ang biktima gihangyo sa suspek nga papaulion na tungod kay hubog na kini.

Apan ang biktima gikatahong nasuko ug misagpa sa suspek hinungdan nga nasuko ang naulahi ug gikulata ang maguwang nga miresulta sa ilang lamok-lamok.

Ang mga higala ug silingan mao nay miulang kanila ug silang duha gipapauli, apan kagahapon sa buntag, ang biktima gikatahong nanghagis ug buot pagawson ang suspek aron tapuson ang ilang panagbangi.

Ang suspek gikatahong migawas dala na ang usa ka kutsilyo ug kalit nga mihansak niini sa lawas sa iyang maguwang dayon nagdaling miikyas ug wala na maabti sa mga mirespondeng sila si PO2 Alvin Llamedo ug PO1 Christopher Castro.