Inasal festival gisugda'g parada

Gisugdan sa mga ala una sa hapon kagahapon ang dakong parada sa Halad Inasal Festival sa pagsaulog sa pista sa dakbayan sa Talisay.

Adunay 82 ka float ang misalmot sa nahisgutang parada nga gilangkuban sa nagkalainlaing grupo.

Ang parada sa Halad Inasal Festival kombinasyon sa street dancing nga halad sa patrona sa siyudad Santa Teresa de Avila ug sa parada sa mga lechon baboy nga gisakay sa nahisgutang mga float.

Si Konsehal Shirley Belleza kinsa maoy chairman sa maong kalihukan nagkanayon nga bisan og limitado ang ilang budget karon itandi sa milabay'ng tuig usa ka dakong event gihapon ang ilang gipahigayon.

Niining tuiga gipasalmot sa Tourism and Heritage Council kinsa si Belleza usab ang chairman sa parada ang mga traysikad nga adunay mga sound system para madungag sa kasadya sa festival.

Si Belleza mitataw nga dili moubos o motaas sa P250 ang matag kilo sa inasal nga ibaligya atol sa festival sa dakbayan ug wala nay gipahigayong kumbira human sa parada sama sa milbay'ng tuig.

Kahinumduman nga sa milabay'ng tuig daghan ang nagbagolbol tungod kay adunay mikuyanap nga taho nga ibaligya og P100 matag kilo ang inasal sa siyudad human sa parada hinungdan nga adunay mga bisita ug residente sa dakbayan nga mianha dayon sa lugar diin gi-display ang mga inasal aron mamalit.

Apan ang maong mga tawo nasugamak tungod kay dili tinood ang ilang nadawat nga balita nga ipamaligya sa ubos nga presyo ang inasal human sa parada.