Tulo ka lalaki 'dakpan

Tulo ka tawo ang nangadakpan tungod sa paghupot og gidiling drogas sa managlahing operasyon sa Cebu City Police Office gikan sa duha ka managlahing lugar niadtong milabay'ng gabii.

Ang mga suspek giilang sila si Silvestre Gador,29, taga dalan J.Osmeña extension, Jeorge Canillo,taga Sagay, dakbayan sa Toledo ug Philip Malagar, taga Bahak, lungsod sa Liloan.

Ang grupo ni Supt. Pablo Labra ug Chief Inspector George Ylanan mipahigayon og checkpoint diha sa dalan V.Rama sa barangay Calamba nga miresulta sa pagkadiskubre sa duha ka paketeng may sulod nga gidudahang shabu gikan kang Gador.

Gawas pa niini, nakuhaan usab siya og upat ka mga aluminum foils ug tissue paper nga gituuhang gamiton sa pagsuyop og shabu.

Samtang sa sunod nga operasyon, nangadakpan usab sila si Canillo ug Malagar diha sa sudlunong bahin sa barangay Camagayan.

Ang duha nakuhaan og mga gamit sa pagsuyop hinungdan sa ilang pagkaaresto.

Ang maong susamang operasyon gisugdan sa kapolisan niadtong milabay'ng Miyerkules sa gabii subay sa Oplan Paglalansag Omega nga kampanya sa kapolisan sa tibuok nasud.

Ang maong kampanya gitumong aron pagpangita og mga loose firearms, mga drogas ug mahait nga hinagiban lakip na iligal nga mga kalihukan diha sa kadalanan.

Lakip sa ilang puntiryahon mao ang imnanan, bar, diskohan ug mga bilyaran dinhi sa dakbayan nga maoy giisip sa kapolisan nga sagad diha magsugod ang krimen.