Dugang 45 ka polis gidugang sa Talisay

Dugang 45 ka polis gikan sa Cebu Police Provincial Office (CPPO) ang temporaryong gidestino sa dakbayan sa Talisay para hugtanong mamentenar ang kahapsay ug kalinaw sa siyudad atol sa pagsaulog sa pista karong adlawa (Oktubre 15, 2006).

Gibutyag kagahapon ni Police Superintendent Romeo Perigo, hepe sa kapolisan sa dakbayan nga sa milabay'ng adlaw miabot sa Talisay ang nahisgutang mga polis diin pito niini mga sakop sa bomb squad disposal.

Ang uban sa maong mga polis sakop sa Special Reaction Force (SRU) ubos ni Senior Inspector Romeo Santander, hepe sa SRU.

Matud ni Perigo nga ang nahisgutang mga polis idestino diha sa mga lugar nga pahigayonan sa mga kalihokan sa pista para pagsiguro nga mamentenar ang kahapsay ug kalinaw.

Ang siyudad adunay 114 karon ka polis, 63 niini ang organic personnel ug 51 ka personnel ubos sa Field Training Program (FTP) nga i-deploy para sa crowd control.

Lakip sa mga ipangdestino sa mga lugar sa siyudad diin ipahigayon ang mga kalihokan sa pista ang ubang mga barangay tanod.

Ang mga kalihokan sa pista sa siyudad gipahigayon sukad niadtong petsa uno niining buwana diin ang kapolisan usab ug ang komitiba sa kahapsay ug kalinaw kanunay sa ilang pagbantay para masiguro nga masumpo dayon ang mga tawo kinsa magpakita og dautang lihok.