40 ka paketeng shabu nasakmit

Usa ang nakuhaan og drogas atol sa usa ka saturation drive nga gihimo sa kapolisan diha sa Sitio Looc, Barangay Maribago dakbayan sa Lapu-Lapu kagahapon sa kaadlawon.

Matud pa ni P/Sinsp. Jonathan Peneda ang Deputy Chief for Operation katuyuan sa maong saturation drive mao ang pagsikop sa mga dunay pending Warrant of Arrest (WA) sa nagkalain laing kaso nga mga residente sa maong dapit, pagsusi kung kinsa ang mga bag-ong salta sa maong sitio ug ang paghatag og impormasyon sa pagmintinar sa kahapsay ug kalinaw sa nagsingabot nga ASEAN summit.

Dunay napulo ka mga WA nga gidala ang kapolisan diin ang mga subject niini adunay nagkalain-laing kaso mao si Roldan Pangatungan sa kasong Frustrated Murder, Alan Aying sa kasong theft, Wilson Oyao, et al sa kasong illegal nga drugas, Franklin Garciano sa kasong theft, Dani Pangatungan sa kasong illegal possession of firearms, Maralo Hinagon sa kasong rape, Romeo Baring Amistad sa kasong illegal nga drugas, Ludy Anudling sa kasong estafa, Antonio Pangatungan sa kasong theft ug Ereneo Aying sa kasong murder.

Ang tanang mga kalalakin-an sa maong dapit gipagawas sa ilang panimalay sayo sa buntag kagahapon ug gipapungko sa basketball court aron masuta kung anaa ang mga subject sa mga WA.

Apan sa pagsusi ni Barangay Konsehal Joseph Pangatungan wala diha ang gipangita, atol sa pagrekisa sa mga lalaki usa ka Jade Rejoy, 21, ang nakuhaan sa iyang posisyon sa 40 ka gagmay'ng pakete nga may sulod nga gituhuang shabu nga gisud sa usa ka kaha sa sigarilyo lakip na ang listahan sa mga kontak niini.

Matud pa ni PO3 Ranilo Valliente iyang nasugatan si Rejoy apan misuway unta kini og dagan maong ilang gipugngan hinungdan sa pagkadiskubre sa mga drogas.

Human sa maong saturation drive gipapauli ra usab ang mga katawhan ug si Rejoy gidala sa buhatan sa kapolisan alang sa pagpasaka og kaso niini sa paghupot og illegal nga drogas.