Sa milabay'ng adlaw ang grupo sa nagpakabanang drayber miduso og reklamo ni Bise-mayor Aberdovey Belleza, tsirman sa traffic commission kabahin sa nahisgutang problema.
Gibutyag usab sa mga drayber ngadto ni Belleza nga ang mga polis nga nadestino diha ubos sa fly-over sa Tabunok dili mobadlong sa mga dispatser nga mangayo kanila og "tong".
Si Perigo sa iyang bahin sa pakighinabi niini sa Banat News kagahapon mitataw nga wala pa siya'y nadawat nga kopya sa reklamo sa mga drayber.
Matud sa hepe nga angayang moduso og pormal nga reklamo ang maong mga drayber para maaksiyonan dayon ang ilang problema para usab sa legal nga basehan.
Si Perigo mibahad nga ang pundok sa mga drayber nga hingtungdan ug ang giingong mga dispatser nga mangilkil iyang ipatawag kung aduna na siya'y madawat nga pormal nga reklamo.
Ang mga polis usab dili makapahigayon og pamadlong kung walay pormal nga reklamo.
Si Perigo midungag nga mopahigayon siya og imbestigasyon sa mga polis nga nadestino diha sa lugar kung aduna siya'y madawat nga reklamo batok sa maong mga polis kinsa giingong dili mamadlong sa mga dispatser nga mangilkil sa mga drayber.
Ang Banat News napakyas og kuha sa habig ni Belleza tungod kay dili ma-contact ang cell phone niini dihang gitawagan kini kagahapon sa hapon.