36 ka menor sa prisohan nakapahimulos

Nikabat na sa 36 ka mga menor de edad nga nabalhug sa Operation Second Chance ang nakapahimulos sa programa sa siyudad sa Sugbo hinungdan nga nahimo na sila karung gawasnon ug hinay hinay nang nahibalik sa pagtungha.

Wala pa kini labot sa laing duha pa ka menor de edad nga si Gogoy, 17 anyos, taga Bukidnon ug Jesha, 17 anyos, taga Sta Mesa Manila nga gipasagdan sa ilang mga ginikanan ug nahiabot dinhi sa dakbayan ug nalambigit sa binu-ang hinungdan nga nabilanggo.

Si Gogoy nadakpan tungod sa iyang pagpananom og marijuana sa bukirang barangay sa Babag hinungdan nga nabalhug sa operation second chance ug si Jesha nilayas gikan sa iyang pamilya sa Manila apan nadakpan paghiabot dinhi sa dakbayan tungod sa kasong pagpangawat.

Sila si Jesha sa pagkakarun gawasnon na ug naningkamot nga makatiwas sa pagtungha aron makakita og kaugalingong trabaho, "I am very thankful though that I was brought in operation second chance.I did not see this as a punishment but an opportunity to experience that you are loved and cared for",dugang asoy ni Jesha.

Samtang si Gogoy nakagawas na usab sa operation second chance ug nagpaabot nalang nga kuhaon sa iyang mga ginikanan sa Bukidnon,"Dinhi ko nakakita sa saktong pagtan-aw sa akong kaugalingon nga gihatagan kami ug bili diri maski nakisalaod kami.Andam nako mogawas balik sa akong pamilya sa Bukidnon",dugang asoy ni Gogoy.

Kining tanan tungod sa gihimong paningkamot sa Cebu City Task Force on Children nga gidumala ni Cebu City first lady Margot Osmeña ug sa Cebu City Welfare for the Protection of Children (CCWPC) nga gi-abagan sa kagamhanan sa siyudad sa Sugbo.

Ang maong mga menor de edad pagkakarun gibalhin na sa balay pasilungan diha sa Pari-an nga gitabangan sa siyudad ubos sa Department of Social Welfare and Services (DSWS) aron makabalik sa pagtungha.

Gawas niini duna pay laing 53 ka mga pinirisong menor de edad ang gibuhi-an na sa Operation second chance ug gibalik sa ilang tagsa tagsa ka mga ginikanan.

Samtang laing pito pa ka menor de edad nga gikan sa Operation second chance gibalhin kini karun sa Regional Rehabilitation Center didto sa lungsod sa Argao.

Gipadayag ni Margot Osmeña atol sa iyang state of the childrens report niadtong miaging adlaw nga usa kini sa mga hinungdan nga gideklarar ang siyudad sa Sugbo nga most Friendly City sa tibuok nasud tungod sa mga programang gipatuman sa siyudad pag-atiman sa mga kabataan.