MCWD Board gihagit sa konseho, barugan ang unang desisyon

Gihagit sa mga opisyal sa siyudad sa Sugbo ang mga sakop sa board sa Metro Cebu Water District (MCWD) nga barugan ug tinuoron niini ang nahaunang desisyon nga pagkansilar sa P200 milyones nga development cost nga gipangayo sa Ayala Estateland Consortium ngadto sa modaug nga challenger pagsupply og tubig.

Kini human ang Ayala consortium padayong niinsister ug nisuwat pa ngadto kang NEDA Secretary Romulo Neri aron ipabilin diha sa terms of preference ang P200 milyones nga ilang gipangayo nga development cost.

Hinuon matod ni mayor Tomas Osmeña nga magpaabot siya nga barugan sa MCWD board ang gipakanaug niining desisyon og dili una siya mohimo og lakang.

Apan gibutyag sa mayor nga napugos lang ang Ayala sa pagpadayon niining mao nilang offer tungod kay dili kini ganahan nga ma-uwawan human mabulilyaso ang mahal ra kaayu nilang offer pagsupply og tubig sa MCWD.

Samtang gipadayag sa mayor nga kon siya maoy pahukmon inay single source himoon nalang nga open source ang tubig nga kuhaon sa supplier aron maoy ideliber sa MCWD.

Padayong gituohan ni Osmeña nga mas mahal ra ang P25.55 nga offer sa Ayala bisan og kuha-on pa ang development cost kon itandi sa offer sa ubang mga lokal supplier.

Ang Cebu Bulk Water Consortium padayong interesado nga mo-offer og minus sa P20 pesos per cubic meter nga tubig og P18 pesos sab ang sa Mactan Rock Industries.