Dispatser nga mangilkil sa Tabunok gireklamo

Grupo sa drayber sa Tabunok, Talisay ang miduso og reklamo ngadto ni Bise-mayor Aberdovey Belleza, tsirman sa Talisay Traffic Commission batok sa mga dispatser diha sa lugar tungod sa pagpangolekta og "tong" sa maong mga dispatser ngadto kanila.

Ang nahisgutang mga drayber mibutyag nga nakahatag kanila og kasamok ang maong mga dispatser diin kolektahan usab sila niini og kwarta kung mopasakay sila og pasahero diha sa lugar.

Ang grupo sa nagpakabanang mga drayber nagkanayon nga adunay mga dispatser diha ubos sa fly-over sa Tabunok nga pareha og mga "buaya" nga mangayo og P5.00 kada drayber nga moagi diha sa lugar.

Ug laing P5.00 ang kolektahon sa maong mga dispatser gikan sa mga drayber kung motabang kini og panawag og mga pasahero.

Gibutyag usab sa maong mga drayber nga masuko ang mga giingong naghupot sa maong mga dispatser kung dili sila mohatag og "tong".

Ang mga drayber mipasangil usab nga kung dili ka miyembro diha sa grupo dili ka pwedeng mopundo para magpasakay og pasahero ug ang mga traffic enforcer ug polis nga nadestino sa lugar dili mobadlong sa maong mga dispatser.

Ang mga drayber midungag nga ang maong sitwasyon nakapasamot sa ilang problema diin magbayad pa sila og P20.00 matag sulod nila diha sa Citylink Terminal.