Smuggled nga sakyanan 'sakmit

Upat ka mga right hand drive nga mga mahalong sakyanan ang gikatahong gisuwayan og palusot gawas sa Cebu International Port niadtong Miyerkules, apan ang mga awtoridad sa pantalan daling nakarekober niini diha na sa dakbayan sa Lapu-Lapu.

Ang maong mga sakyanan gikatahong gikarga sa usa ka forty-footer van paggawas sa maong pantalan gamit ang gidudahang minao-maong mga dokumentos.

Ang nabawi mao ang usa ka Mitsubishi Pajero, Toyota Celica sports car, duha ka Nissan Terrano, diin gikatahong duha kanila duna nay gitapot nga plate number.

Gimando na ni Cebu District Customs Collector Ricardo Belmonte ang paghimo og lawom nga imbestigasyon sa maong kaso aron pagtino kung si kinsa ang nalambigit niini.

Ang maong mga sakyanan gikatahong nakumpiskar pabor sa gobiyerno niadtong si kanhi Cebu Customs Collector Atty. Maria Lourdes Mangaoang pa ang naghawid sa maong buhatan niadtong Marso ning tuiga.

Base sa report, ang maong mga sakyanan dad-on padulong sa Larena, Siquijor ilawom sa pangalan sa usa ka consignee nga GLRC Marketing, apan giingong "misdeclared" kini kun kadtong mga papeles niini wala magtukma, gikumpiskar kini sa BOC-Cebu pinasikad sa warrant of seizure niadtong Hulyo 25 ug gibutang sa kustodiya sa wharfinger division.

Ang hiniusang pwersa sa Customs Police ug Customs Investigation and Intelligence Service (CIIS) mipahigayon og operasyon pagpangita niini human sa insidente nga miresulta sa pagkarekober sa mga sakyanan sa Bangkal, Lapu-Lapu. Niadtong Agosto 11, ang custom broker nga si Unalee Monares gikatahong mi-file og entry sa mga used scaffoldings gikan sa Singapore nga consigned sa pangalan sa Eastland Property Ventures, Inc. gamit ang numero sa van nga maoy gisudlan sa maong mga sakyanan apan giingong gipatuong giabandonar na nila kini.

Usa ka bulan ang milabay, mi-request si Monares nga padayunon ang pag-proseso sa maong entry, diin si Customs law division chief Edward James Dy Buco maoy miendorsar niini ngadto sa district collector kinsa mitugot usab tungod kay giingong wala man kini maapil sa mga gidudahang kargamento ug gisertipikahan usab sa CIIS ug Customs police.

Gamit ang gidudahang peke nga dokumento napagawas ni Rogelio Manilquez sa wharfinger ang maong van pasado alas 11:52 sa buntag niadtong Miyerkules.

Human madiskubrehing ang van nga gipagawas maoy gisudlan sa maong mga sakyanan gilusad dayon ni CIIS chief Rico Rey Holganza ug Customs Police chief Isidro Estrera ang hot pursuit operation nga miresulta sa pagkabawi sa mga sakyanan nga giingong gisugdan na og kombertir.

Matud pang Estrera usa ka Jose Dulay maoy giingong nangangkong tag-iya sa maong mga sakyanan lakip na ang ubang mga tawong nalambigit gikatakdang kasuhan sa awtoridad.