CIIB nagtuyok para Oplan Bakal

Gatusan ka mga polis sa Cebu City Police Office mipahigayon og pagpangapkap ug pagrekisa sa mga kustomer sulod sa mga imnanan dinhi sa dakbayan niadtong milabay'ng gabii.

Ang kapolisan pinanguluhan sa Criminal Investigation and Intelligence Branch misusi sa tanang mga bar ug bilyaran diha sa mga dalan Sanciangko, Colon, Junquera, Manalili, Pelaez, Osmeña Boulevard, Mango Avenue ug uban pang mga bar sa uptown Cebu.

Wala hinuoy nadakpang tawo nga naghupot og armas atol sa maong operasyon.

Si Chief Inspector George Ylanan mitug-an sa mga tigbalita nga ang maong lakang usa lang sa nahuna-hunaang paagi sa kapolisan aron mapakgang ang posibleng mahitabong krimen.

"Ang ato lang man gyud ana preventive measures ra," asoy pa sa opisyal.

Ang maong kampanya nasubay sa "Oplan Bakal" ilawom sa flagship sa anti-criminality campaign sa kapolisan sa nasud nga Oplan Paglalansag Omega diin tuyo mao ang pagpangita sa mga loose firearms ug mga mahait nga hinagiban diha sa kadalanan.

Sumala pa sa mga polis ang mga imnanan maoy sagad nga dapit diin mahitabo ang panag-initay sa mga kustomer nga moresulta sa pagpatay ug pagkaangol sa mga kustomer.

Usa usab sa namatikdan sa kapolisan mao nga ang mga imnanan maoy sagad estambayan sa mga gang ug managribal nga mga fraternity sanglit walay mga gwardiya kun itandi sa mga dagkong bar.

Ang maong kampanya gipaabot nga molungtad pa sa mosunod nga mga adlaw.