Gloria giawhag ibasura Ayala- MCWD water deal

Usa ka grupo sa mga molupyo sa Metro Cebu ang niawhag kang Presidente Gloria Macapagal-Arroyo nga ipabaliwa ang kontrata sa tubig nga giduso sa Ayala Group ngadto sa Metro Cebu Water District.

Ang grupong gitawag og Katawhan Alang sa Barato nga Tubig (KABAT) nga gipangulohan ni Nolan Badon ang nipahigayon og rally atubangan sa Parklane Hotel kagahapon diin gipahigayon ang usa sa mga kalihokan nga gitambongan ni Arroyo sa Sugbo.

Ilang giawhag si Arroyo nga ibalik sa National Economic Development Authority ang pagdesisyon sa pagdawat sa mga bidding ug kontrata ug kinahanglan sundon ang proseso sa bidding sa tanang kontrata kabahin sa tubig.

Ila usab gisugyot ang pagtukod og inter-agency task force nga langkuban sa sektor sa mga negosyante, lokal nga kagamhanan ug mga konsumidor.

Buot usab ang grupo nga dunay sub-sub nga konsultasyon sa tanang stakeholders labi na sa hut-ong sa mga konsumidor.

"Nanghinaot kami nga kahatagan og pagtagad kining lehetimong demanda alang sa kaayohan sa mga kabus nga konsumidor," nagkanayon ang grupo.

Ilang gipadayag ang kamahinungdanon sa tubig sa kinabuhi sa katawhan.

Dili buot ang grupo nga sama sa kuryente mosaka ug magmahal nasad ang tubig tungod sa kontrata nga dili makiangayon ngadto sa mga konsumidor.