Fratmen sa Naga, gikasuhan

Gipasakaan na og kaso sa piskaliya ang duha ka sakop sa managribal nga fraternity kagahapong adlawa tungod sa nahitabong engkuwentro didto sa Naga niadtong Martes sa gabii atol sa kasaulogan sa pista ni St. Francis de Assissi diin miangol og usa.

Ang gipasakaan og kaso mao sila si Jehzel Paner sakop sa Akrho ug Dennis Caballero kinsa sakop usab sa Tau Gamma Phi human masikop sa kapolisan human sa insidente ug nakuhaan og tagsa ka armas nga .38 kalibre.

Kasong ilegal possession of firearms ug concealing of deadly weapon ang gipasaka batok ni Paner nga nakuhaan og .38 kalibre ug upat ka uhas sa Indian pana samtang illegal possession of firearms usab kang Caballero human nagdala kini og .38 nga rebolber.

Matud ni SPO1 Bienvenido Delos Santos sa Naga Police mitug-an nga nagpadayon pa ang ilang gihimong hot pursuit operation batok ni Jay Paner.

Suma pa ni SPO1 Delos Santos una nang napasakaan og kasong frustrated murder sa miaging adlaw si Jay Paner.

Ang duha maoy gitumbok nga nipusil ni Joel Hermoso niadtong Martes sa gabii sa dihang nag-abot ang duha ka grupo sa second floor sa munisipyo.

Gikataho nga si Hermoso nakaangkon og daghang samad pinusilan sa lawas lakip na sa wala nga dughan ug anaa pa karon sa Intensive Care Unit sa Vicente Sotto Memorial Medical Center.

Sa sayo pa ang duha ka grupo una nang nag-abot niadtong Domingo sa gabii ug usa kanila nibahad hangtod nga nag-abot pagpabalik sa mao gihapong lugar ug kalit lang namusil ang magsuong Paner.