Rebeldeng mitahan tabangan ni Gwen

Si Gobernador Gwendolyn Garcia mipasalig kagahapon nga mohatag og ayuda sa magtiayong rebelde nga misurender niadtong milabay'ng adlaw ni Mayor Estrella Aribal sa lungsod sa Catmon.

Kagahapon sa buntag atol sa ika-51 kasaulogan sa adlaw'ng natawhan ni Garcia gipresentar diha sa kapitolyo sila si Luciano Puro alyas "Mendo" ug ang kapuyo niining si Roselyn Nura.

Gibutyag ni Puro ug Nura ngadto sa gobernador ang ilang kahimtang sa bukid dihang nagtagotago sila diin adunay mga panahon nga makasinati sila og kagutom ug balatian sa lawas hinungdan nga mihukom silang mobalik na lang sa kagamhanan.

Apan tungod sa black propaganda sa ilang grupo nga nagkanayong pamatyon sila sa mga military kung mo-surender sila unya ang pasanginlang mibuhat sa krimen ang ilang mga kauban hinungdan nga nalangan ang pagtahan nila sa ilang kaugalingon sa balaod.

Si Garcia miawhag ni Marivic Garces sa Provincial Social Welfare and Development (PSWD) nga mag-andam og package alang sa livelihood program ni Puro ug Nura ug edukasyon sa mga anak sa duha.

Tumong sa gobernador nga mahimong sumbanan ang nahisgutang mga rebelde nga maaghat ang uban niining mga kauban nga mosurender usab sa kagamhanan.

Gawas sa nahisgutang tabang, si Garcia miawhag usab sa mga sundalo sa kasigurohan sa kinabuhian ni Puro ug Nura ug ang kagamhanan sa probinsiya mohatag usab og ayuda kabahin sa kaso nga ilang giatubang.

Sa laing bahin, si Lieutenant Colonel Oscar Lasangue mibutyag kagahapon nga aduna silay nadawat nga mga taho kabahin sa mga sakop sa mga rebelde nga gustong mosurender apan dili pa nila mabutyag ang klarong detalye tungod kay ila unang pihuon ang mga impormasyon nga ilang nadawat.