Anti-Sugbuak di mokompiyansa

Dili angayan mokompiyansa ang mga batok sa Sugbuak Bills bisan gituohan nga dili na kini matuki sa Kongreso nunot sa nagsingabot nga eleksiyon sunod tuig.

Kini ang gipadayag ni Bise-Gobernador Gregorio Sanchez Jr. kinsa hugot nga nagsuporta sa signature campaign batok sa Sugbuak nga gipasiugdahan ni Gobernador Gwendolyn Garcia.

Napanglantawan nga gumikan sa kaapiki na sa panahon, dili na matuki sa Kongreso ang tulo ka balaudnon tumong sa paghimo sa mga lalawigan sa Cebu del Sur, Cebu Occidental ug Cebu del Norte.

Apan matud pa ni Sanchez nga gikinahanglan gihapon nga alerto ang mga opisyal ug katawhan nga supak sa maong plano nilang Kongresista Simeon Kintanar, Antonio Yapha Jr. ug Clavel Asas-Martinez.

Gipasabot ni Sanchez nga magpadayon ang signature campaign aron mapaabot gyud ngadto sa Kongreso lakip na kang Presidente Gloria Macapagal Arroyo ang mensahe nga ang kinabag-an sa katawhan sa Sugbo supak sa maong plano.