Daghan nang clubs interesado sa CICC

Wala pa gani mahuman ang Cebu International Convention Center (CICC) duna nay mga opisyal sa mga civic clubs ug mga organisasyon sa mga negosyante sa mga lalawigan sa Central Visayas nga mipadayag sa ilang interes paghimo sa ilang convention sa CICC.

Kini sumala ni Engr. Ricaredo DR San Luis, usa ka organizer og mga kombensiyon , nga nagbase sa Manila.

Si Ginong San Luis opisyal sa usa ka professional nga pundok kang kansang trabaho mao ang pag-organize og mga dagkong tigum kun convention sa nagkalain-laing siyudad sa nasud.

Matud ni San Luis, duna nay mga opisyal sa mga civic groups ug mga professional ug business organizations sa Bohol, Negros Oriental ug Occidental, Siquijor ug uban pang mga kasikbit nga lalawigan sa Sugbo nga mipadayag -- "though informally" -- sa ilang interes nga anhi sa CICC sila mopahigayon sa ilang annual convention.

Ang CICC gitukod dili lang alang sa Asean Summit kundili sa uban usab nga mga dagkong tigum sa nasud. Hapit na kini mahuman ug inigkahuman niini mao niy usa sa mga matahum nga dapit sa Kabisay-an ug Mindanao.