P11.88M nga ekipo gikwestiyon

Gikuwestiyon sa konsehal sa Mandaue ang pagpagawas sa calamity fund nga nagkantidad og P11.88 milyones alang sa pagpamalit og mga ekipo nga magamit sa mahitabong katalagman.

Si Konsehal Wenceslao Gakit nga maoy chairman sa committee on budget and appropriation sa konseho sa dakbayan sa Mandaue maoy nagkuwestiyon niini sa miaging regular session nga ilang gihimo.

Si Konsehal Glenn Bercede kinsa sakop sa City Disaster Coordinating Council nga maoy nangamahan sa maong resolusyon gipangayoan ni Gakit sa legalidad sa maong kantidad.

Si Bercede miingon nga gikauyonan sa panagtigum sa mga sakop sa council ang pagpalit og ekipo isip kabahin sa pagpangandam sa kalamidad.

Naglakip sa paliton nga ekipo mao ang 250-kilo volt boom truck, small water tanker ug fire truck penetrator.

Si Bercede miingon nga ang panginahanglan sa maong matang sa ekipo nakita subay usab sa mga panghitabo nga nasinati sama sa kalit pagkaputol sa suplay sa kuryente, sunog ug uban pa.

Dugang pa niya ang penetrator nga usa ka matang sa water tanker gikinahanglan kaayo sa kabomberohan sa gagmay nga dalan nga mahitaboan sa sunog.

Gibase ni Bercede sa joint memorandum circular sa Department of Budget and Management (DBM) ug Department of Interior and Local Government (DILG) ang pagpagawas sa pundo.