2 ka silot gipahamtang vs pusher

Duha ka silot ang gipakanaog ni Regional Trial Court Branch 58 Judge Gabriel Ingles batok sa usa ka 34-anyos nga lalaki tungod sa pagpamaligya ug paghupot niini og shabu apan giabswelto kini sa ikatulong kaso nga mao ang paghupot og shabu paraphernalia tungod sa kakuwang sa ebidensiya.

Unang silot nga gipahamtang ni Ingles batok ni Arnold Tabuzo taga Sityo Ilang-ilang, Lagtang, Talisay mao ang pagkapriso niini sa tibuok niyang kinabuhi tungod sa iyang pagpamaligya og shabu ug pabayaron usab kini og P500 mil nga multa.

Ikaduhang silot mao ang pagkapriso ni Tabuzo sulod sa 12 ngadto sa 15 ka tuig tungod sa paghupot niini og shabu ug pabayaron usab kini og P300 mil nga multa apan giabswelto kini sa kasong paghupot og shabu paraphernalia.

Niadtong Septiyembre 2004, si Tabuzo nasikop sa gipahigayong buy-bust operation sa grupo sa Provincial Drug Enforcement Agency (PDEA).

Si Tabuzo napalitan og lima ka pakete sa shabu poseur buyer sa PDEA nga nagkantidad og P1,000 gamit sa maong poseur buyer ang duha ka P500 nga marked money.

Gawas sa maong pagpamaligya, si Tabuzo nasakmitan pa gyud sa mga polis og tulo ka paketeng shabu nga iyang gihuptan.

Apan si Tabuzo mihimakak sa mga pasangil batok kaniya.

Usa sa mga testigos pabor ni Tabuzo mao ang iyang 10-anyos nga pag-umangkon nga nagkanayon nga ang mga polis adunay gipangutana sa iyang uyoan kabahin sa usa ka Melvin Bacus nga namaligya og ginadiling drugas apan ang maong bata mitumbok usab og usa ka Benjie nga maoy namaligya og shabu diha sa ilang lugar ug nahadlok siya dihang nakadungog siya og buto sa pusil.

Si PO2 Jose Erwin Dumaguit kinsa usa sa mipahigayon sa buy-bust operation nagkanayon nga sa wala pa ipahigayon ang nahisgutang operasyon gipanid-an una nila si Tabuzo sulod sa tulo ka adlaw ug si Sr. Inspector Alfredo Macabudbod maoy migama sa pre-operation report sa maong pagpaniid.

Sa wala pa nila dalha si Tabuzo gikapkapan una nila kini apan nagdumili ang akusado sa pagpakapkap hinungdan nga adunay mga tawo ang nanuol ug daling mipabuto og usa ka warning shot ang mga otoridad pagkontrolar sa mga midugok nga tawo.

Si Tabuzo, sa iyang bahin usab mibutyag nga duha ka tawo ang miabot diha sa ilang lugar ug nangutana kabahin sa usa ka Bingbing ug gitudlo niya ang balay ni Bingbing sa maong mga lalaki.

Ang maong mga lalaki mipaingon sa balay ni Bingbing ug ang usa kanila mipabuto og warning shot paingon na unta siyang modagan apan nabantayan na lang niya nga usa sa maong tawo mition na niya og pusil sa likod ug gimanduan siya niini nga ipataas ang iyang mga kamot.

Gihimakak ni Tabuzo nga nasakmitan siya sa mga polis sa nahisgutang mga ebidensiya.

Apan ang maong mga pamahayag ni Tabuzo wala hatagi og gibug-aton ni Ingles hinungdan nga gipahamtangan kini sa nahisgutang silot.