Mao kini pagtuo ni Konsehal Procopio "Coping" Fernandez, chairman sa committee on police fire and penology human mabaniog ang planong pag-isyo sa siyudad og mga armas sa mga traffic enforcer.
Apan tungod sa mga panghitabo niining milabay'ng mga adlaw diin daghan ang mga traffic enforcer ang walay mahimo batok sa mga abusadong drayber mipabor na ang konsehal nga mas makaayo sa maong mga enforcer nga isyuhan kini og mga lisensyadong armas.
Kini aron dunay magamit pagpanalipod sa ilang kaugalingon kun mohimo og dautang lakang ang mga abusadong drayber nga ilang madakpan.
Gibasehan sa konsehal ang nahitabo sa traffic enforcer nga si Danilo dela Peña nga nadunggaban sa PUJ drayber nga si Wenilito Esconas dihang nasuko kini nga gidakop sa biktima tungod sa kalapasan sa lagda sa trapiko.
Nunot niini, giawhag sa konsehal kadtong mga drayber nga dunay reklamo batok sa ubang mga traffic enforcer nga nag-abusar sab sa ilang trabaho sa pagduso og pormal nga reklamo niini diha sa iyang buhatan o sa buhatan ni Mayor Tomas Osmeña.
Gipasalig sa konsehal nga dili sab sila magduhaduha pag-imbestigar og pagtaktak niadtong mga traffic enforcer nga abusado sa posisyon.
Sama kang Osmeña, uyon si Fernandez nga angay nang isyohan og armas ang mga piniling traffic enforcer kun makapasar kini sa mga rekisitos.