Nahitabo kini duol sa dakong department store sa dalan Logarta, Subangdaku, Mandaue kagahapon sa kaadlawon.
Si Rodolfo Flores, 46, ulitawo nga lumad nga taga Davao City ug temporaryong nagpuyo sa Sitio Aroma, Brgy. Subangdaku, Mandaue gipusil sa tawo nga nagsakay og gray nga van nga mihunong duol sa Makro.
Base sa imbestigasyon nga gihimo ni PO1 Recardo Mejia sa Station 2 sa Mandaue nga namalong sa suga ang van ug pipila ka gutlo, usa ka buto ang nabati sa mga tawo.
Adunay drayber sa PUJ nga milabay sa maong dapit ug maoy mipahibalo sa mga lumolupyo nga adunay patay'ng lawas sa tawo nga nagbuy-od ug nagkadugo.
Gumikan niini, gisusi sa mga residente sa maong dapit ug positibong giila ni Antonio Flores, paryente sa biktima, nga kini usa ka ex-convict ug sakop sa BC-45.
Matud pa ni Antonio nga bag-o lang nga miabot si Rodolfo gikan sa Davao City ug gumikan kay pareho sila og apelyedo iya kining gipasaka sa iyang panimalay.
Subay niini, nasuta sa kapolisan sa Station 2 nga dunay samad pinusilan si Rodolfo sa iyang ulo hinungdan sa iyang hinanaling kamatayon.
Wala usab gisalikway sa kapolisan ang posibilidad nga binuhatan kini sa vigilantes samtang nagpadayon pa ang imbestigasyon sa maong krimen.
Ang pagkahagba ni Flores ikaduha na kini karong bulana diha sa Subangdaku human nga usa ka wala pa mailhing tawo ang gipatay usab sa maong dapit nga gibaatan ang baba ug kamot niini sa wala pa kini pusila sa wala pa usab mailhing mamumuno.