Awol nga polis kuhaa'g shabu

Kanhi polis nga mi-AWOL sa Mandaue City Police Office nadakpan ug nakuhaan og gituohang shabu ug timbangan niini.

Si Sandro Ariesgado, 32, taga Lorega-San Miguel nadakpan ni SPO1 Ricardo Escobedo kagahapon sa kaadlawon ug nabalhog na karon sa Mabolo Police Station.

Si Ariesgado nagranggo og PO1 sa dihang mi-AWOL sa Mandaue niadtong Marso, gikan nga nadestino sa Regional Mobile Group sa Zamboangita, Negros Oriental.

Matud ni SPO1 Escobedo nga samtang nag-foot patrol sila sa lugar, gisugo niya ang asset nga mopalit og shabu kang Ariesgado balor og P200. Pagtunol sa shabu ngadto sa asset, giposasan kini ni SPO1 Escobedo. Nakuha sa balay ni Ariesgado ang timbangan.

Si Ariesgado mihimakak nga iya ang maong shabu ug timbanga ug mipasangil nga gikalitan lamang siya og hamag sa polis.

Gipasangil ni Ariesgado nga sa polis gikan ang shabu.