Minahan miulbo; 1 patay

Patay ang usa ka minero samtang naangol usab ang tulo ka mga kaubanan niini human miulbo ang bangag nga ilang gisudlan diha sa Adlaon Energy Development Corporation nga naa mahimutang sa Balaas lungsod sa Argao kagahapon sa buntag.

Ang maong minahan gimando na sa Department of Energy -7 nga isuspenso una ang operasyon samtang gihimo pa ang imbestigasyon.

Ang namatay giilang si Alfredo Sombilon, 35, nga taga Manlapay, Dalaguete samtang nakaangkon og second ug first degree burn nga paso sa kalawasan ang tulo niya ka kaubang sila si Andres Balungcas, 42, taga Manlapay, Dalaguete, Romulo Ortega, 42, taga Botong, Argao ug Roberto Dibolusad, 22,.

Ang grupo sa mga biktima nga gilangkuban og lima ka tawo matud pa maoy 'first shift' niadtong adlawa, apan ang usa kanila nga naulahi mao ray naluwas sa aksidente.

Si Department of Energy -7 director Antonio Labios mitug-an sa Banat News nga ilang imbestigahon kung unsay hinungdan sa pag-ulbo ug kung dunay tulubagon ang kompaniya sa aksidente.

Ang DOE-7 mipadala na og mga imbestigador diha sa maong minahan aron matino kun nisunod ba sa security guidelines ang minahan ug sa hinungdan sa pag-ulbo ug pagkatumpag sa pipila ka bahin sa maong tunnel.

Si PO2 Jojit Abah sa Argao police station sa pakighinabi sa Banat News mibutyag nga ang mga naluwas mitug-an nga mi-spark ang linya sa kuryente diha sa sulod nga gikutayan sa sugang dagitab.

Matud pa ni Abah nga ang pag-spark gidakop dayon sa methane gas nga naa sa palibot hinungdan sa pag-ulbo.

"Base sa mga biktima, ni-spark kuno ang electric wire mao tong ang methane gas midakop sa kalayo, nasunog ni sila sir, kining namatay maoy nasentro kay nag-una man daw ni siya," asoy pang Abah.

Ang methane gas usa ka matang sa hangin nga sagad mapundo ilawom sa yuta nga dunay mga deposito sa mineral sama sa coal , wala kini kolor ug baho apan dali kining moulbo.

Niadtong Disyembre 11, 2005, miulbo usab ang minahan sa Sitio Canawilao, Barangay Dumalan lungsod sa Dalaguete diin walo ka tawo ang natabunang buhi ug patay nang nakuykuyan.

Namatay niadtong tungura mao sila si Boyet Geraldez, 25, taga Barangay Inayagan, Naga, Henrino Zuniega Semanis, Francisco Ybañez Cataytay, Jaime Mengue Sanchez, Manuel Pagador Lanogan, 45, Antonio Ejercito Jose, 47, Gregorio Guzon Amad, 35, pulos mga molupyo sa maong barangay ug Nelson Villasis, taga Basay Negros.

Ang mga biktima minero sa Ibalong Resources and Development Corporation nga gidumala sa Taiwanese nga si Yang Tong Yang, ang DOE mipasuspenso sa maong minahan apan ning bag-uhay lang gipabalik og abli.