Supt. Catabas pabilin gihapon

Pormal nga gipahibalo ni Mayor Thadeo Ouano ang pagpabilin ni Senior Superintendent Eduardo Catabas Jr., isip director sa kapolisan sa dakbayan sa Mandaue.

Gipadayag kini ni Ouano sa iyang pagpamulong sa gihimong programa human sa flag raising ceremony kagahapon nunot usab sa pagkapupos sa 72 oras nga tagal sa pagsulbad sa maong insidente.

Matud pa ni Ouano nga ang pagtambong ni Senior Superintendent Catabas sa matag Lunes nga flag raising ceremony sa mga kawani sa dakbayan maoy mga timailhan sa pagpabilin niini isip pangulo sa kapolisan.

Dugang pa niya nga natagbaw siya sa gipakitang lihok ni Catabas sa pagsulbad sa kaso ni Narciso Damole, manager sa Allied bank sa maong dakbayan nga gitulis dihang nag-ilis kini og ligid sa sakyanan sa reclamation area.

Si Catabas miingon nga nagtinabangay karon ang National Bureau of Investigation (NBI-7) Criminal Investigation and Detection Group (CIDG-7) ug ang MCPO sa pagsulbad sa pagtulis ug pagpatay kang Damole.

Kini gitumong alang sa dinaliang pagsikop sa mga suspetsado nga mga notadong tulisan nga nagbase sa dakbayan sa Sugbo.

Dugang pa niya nga gikatakda na ang ilang pagpasaka og kaso sa mga suspetsado nga ang mga pangalan dili pa nila mahimong ibutyag sa publiko sanglit nagpadayon pa ang ilang operasyon sa pagsikop niini.