Dispatser sa Mandaue gidakop

Upat ka dispatser sa PUJ nga pasaheroan ang gitanggong sa detention cell sa kapolisan human madakpi sa akto niadtong miaging Domingo sa ilang pangulekta og kuwarta sa mga drayber sa PUJ.

Ang upat giila nga mao sila si Julius Matunog, 23, ulitawo, Eduardo Abacial, 20, ulitawo, Jojo Corbeta, 23, ulitawo ug Mario Sapio, 46, minyo ug pulos lumolupyo sa dakbayan sa Mandaue.

Si PO2 Joseph Andrin ug mga kauban sa kapolisan sa Presinto 1 sa Centro Police Station maoy nakadakop sa akto sa mga suspetsado nga nangayo og salapi isip bugti sa pagpasakay nila og pasahero.

Si PO2 Milgen Camacho nga gikahinabi sa Banat News miingon nga ang upat nasigpatan nila ni PO2 Andrin nga nanawag og pasahero sa PUJ sa nagkadaiyang dalan sa dakbayan.

Dugang pa niya nga base sa ordinansa nga gituman sa dakbayan ang pagdawat og salapi gikan sa mga drayber sa PUJ nga namasahero ang giisip kining kasong ekstorsyon nga nahimo.