CITOM mao ray agdon — FESAGS

Mag-agad sa rekomendasyon sa kadagkoan sa City Traffic Operations and Management CITOM ang pagluwat og lisensya alang sa pagkupot og armas sa mga sakop sa CITOM matud pa ni Col. Lyndon Lawas sa Firearms and Explosives, Security Agencies and Guards Supervision Section (FESAGS.)

Si Lawas mibutyag nga paabuton niya ang CITOM maoy mosusi sa ilang mga sakop kon kinsay angayang padad-on og armas.

Alang kang Lawas nga dili tanang tawo nga gustong modala og armas, hatagan og lisensya sa Fesags.

Miingon siya nga bisan kinsa basta dili pasado sa "gun safety seminar" ug "proper handling of firearms," nga seminar dili gayud siya makakupot og armas.

Ang pamahayag ni Lawas sa DYMR Radyo ng Bayan Cebu maoy iyang reaction sa mando ni Mayor Tomas Osmeña nga padad-on og armas ang mga ahente sa Citom nga madestino sa kadalanan aron pagpatunhay sa kahapsay sa dagan sa trapiko.

Apan alang kang Lawas nga kinahanglan mopasar una sa mga neuro ug psycho test ang mga aplikante una sila isyuhi ug lisensya aron makatangkil og armas.