Natulog gisaka unya gipusil

Usa ka lalaki nga natulog sa sulod sa ilang panimalay kalit lang gisaka sa wala mailhing tawo ug gipusil nga maoy hinungdan nga namatay alas 8 pasado ang takna sa miaging gabii sa sitio San Lorenzo, Sandayong, Danao.

Ang biktima mao si Romeo Torrejos Bancali, 34, ulitawo nga nagpuyo sa maong dapit.

Si SPO3 Ramorito Ramonida sa kapolisan sa maong dakbayan nga gikahinabi sa Banat News miingon nga si Pedro Bancali nga igsuon sa biktima maoy nagtaho kanila sa maong hitabo.

Matud pa niya nga dali nilang gitubag ang maong alarma ug sa pakisusi ilang nasuta nga nakabaton og lima ka samad pinusilan ang biktima, usa sa agtang, dughan, sa tiyan ug uban pang bahin sa lawas niini.

Base sa asoy sa igsuon maoy nasayran nga gisulod sa wala hiilhing mamumuno ang biktima pinaagi sa guba sa pultahan ug gipukaw dayong pamusil.