Rosas wa mahadlok sa libelo ni Castro

Wala mahadlok si Bureau of Immigration and Deportation (BID-7) regional director Geronimo Rosas sa kasong libelo nga gipasaka ni Cebu City Assistant City Prosecutor Mary Ann Castro sa milabay'ng semana.

Matud pa ni Rosas nga andam niyang atubangon si Castro sa bisan asang hukmanan tungod kay dili siya ang tinubdan sa isyu sa pamantalaan niadtong Hunyo 22 nga nagbutyag nga adunay gitiner nga private secretary si Castro nga nanghilabot sa operasyon sa BID-7 nga walay pagtugot sa ilang labaw.

Dugang pa ni Rosas nga naanad na siya sa mga kasong gipasaka ni Castro nga walay mga basehanan.

Si Rosas miingon nga hangtod karon nagpaabot pa siya sa mando sa Ombudsman Visayas sa kasong gipasaka ni Castro batok kaniya niadtong milabay'ng bulan apan hangtod karon wala pa kini makadawat sa kopya sa kaso.

Kahinumduman nga sa milabay'ng semana, si Castro gikatahong mipasaka og kasong libelo batok ni Rosas ug ni Elias Baquero sa usa ka pamantalaan gumikan sa pag-expose niini nga usa ka Normi Mante ang gihimong private secretary ni Castro nga walay pagtugot gikan ni Justice Secretary Raul Gonzales.

Si Mante, base sa maong taho, maoy mopirma sa mga transaksyon ni Castro kun wala kini sa buhatan sa BID-7 bugti sa kantidad gikan sa mga kliyente nga maoy gibasehan ni Castro sa pagpasaka og kaso batok ni Rosas ug Baquero.