Tulisan misukol napatay sa polis

Gidemalas ang duha ka gipasanginlang mga tulisan human sa ilang pagkanaog sa PUJ nga ilang gitulis gisawod sila og dakop sa usa ka polis nga miresulta hinuon sa pagkapusil-patay sa usa kanila dihang misukol kagahapon sa udto diha sa dalan M.J. Cuenco sa barangay Tinago ning dakbayan.

Ang napusilan giilang si Gerry Bayno, 28 taga Ponce Compound, Carreta ning dakbayan samtang nadakpan ang kauban niining si Romulo Ligan, 41,silingan niini.

Naatlan nga dihay multicab nga gimaneho ni SPO1 Meliton Agadier sa Carcar Police Station uban sa iyang anak ug mga classmate niini gikan sa usa ka department store nga nakakita sa insidente.

Sa imbestigasyon ni SPO2 Genilo Veraque sa Theft and Robbery Section , ang duha misakay sa PUJ nga gikan sa Mabolo diha sa merkado sa Lorega apan pag-abot sa eskina sa dalan Zulueta ug M.J.Cuenco kalit nga mideklarar og tulis ang duha dayong bunot og kutsilyo ngadto sa mga pasahero.

Ang mga biktima giilang sila si Jimer Navarro, 21, Rolia Laborte uban sa singko anyos niining anak, si Irene Bontilao,23, Evangeline Tangoan, 25, ug Benjamin Semanis, 28 ug uban pang pasaherong wala na magpa-blotter sa hitabo.

Matud pang Agadier nga ang kauban sa iyang anak maoy mipahibalo kaniya nga gitulis ang ilang gisundang PUJ maong iyang gipaabot ang pagkanaog sa mga tulisan.

"Nakit-an nako ni siya (mitudlo kang Laborte) gitionan og kutsilyo unya gitangtangan og relo, ako dayong giingnan si Agadier nga gitulis ang jeep," asoy pa sa tinun-ang lalaki.

Si Agadier daling mikanaog dihang manganaog na ang mga suspek ug daling gikwelyuhan si Ligan ug gitionan og armas hinungdan nga dali niining gilabay ang kutsilyo apan si Bayno gikatahong wala motahod ug kalit nga gihansakan si Agadier.

Matud pang Agadier sa Banat News nga nakabantay na siyang may kutsilyo si Bayno maong paghansak niini nakalihay siya, ug dihang nasaylo ang suspek gipusil niya kini makausa diha sa ibabaw sa hawak hinungdan sa pagkalup-og niini.

Ang mga mirespondeng mga polis mao nay midala kang Bayno sa Cebu City Medical Center apan nakabsan kini sa kinabuhi.

Ang estilo sa pagtulis susama sa estilo sa mga tulisan sa Manila diin himulbolan ang tanang pasahero nga panagsa rang mahitabo dinhi sa Sugbo.

Sumala pang SPO2 Veraque, nga posibleng si Ligan anad na niining maong estilo sanglit gikan kini sa Manila ug gidudahang nalambigit usab siya sa susamang modus.

Si Ligan sa pakighinabi sa Banat News miangkon nga konbiktado siya kaniadto sa kasong robbery lima ka higayon ug nabilanggo sa Muntinlupa ug duha ka tuig ug gibalhin ngadto sa Iwahig Penal Colony sa Palawan nga milungtad og trese ka tuig ug siyam ka buwan.