P700 mil naugdaw sa sunog sa Mandaue

Mokabat sa P 700,000 ang gibiling danyos sa nasunog nga bodega sa mga sinakong harina sa Pagsabungan, Mandaue nga gialarma sa kabomberohan alas 12:44 sa miaging tungang gabii.

Si SFO1 Roy Garcia, imbestigador sa Bureau of Fire Protection (BFP) sa maong dakbayan nga gikahinabi sa Banat News miingon nga si Mandaue City Fire Marshal Oscar Mayol mipaubos sa sunog sa second alarm.

Si SFO1 Garcia miingon nga ang tag-iya sa maong bodega nga si Rosa Jezalima ug mga sakop niini sa pamilya nahingangha na lamang sa kalit nga pag-ulbo sa kalayo.

Dugang pa niya nga ilang nakontrolar ang kalayo sa paglabay sa 5 minutos. Wala pa matino ang hinungdan sa sunog.

Sumala ni Garcia nga milampos sila sa pagpugong sa kalayo nga maoy hinungdan nga wala na makatapon ngadto sa laing panimalay ug walay naangol o kinabuhing nakalas sa maong insidente.