PTCA sa Mandaue supak sa Sugbuak

Mga ginikanan ug mga magtutudlo sa dakbayan sa Mandaue ang hugtanong mipadayag sa ilang pagsupak sa tinguhang pagbuak sa Sugbo pinaagi sa pagmugna og dugang tulo ka lalawigan.

Ang ilang hugtanong pagsupak ilang gipakita pinaagi sa resolusyon nga gipalabang sa ilang panagtigom nga gihimo niadtong miaging adlaw .

Kini gitambongan sa mga ginikanan ug mga presidente sa Parents Teachers Community Association (PTCA) sa matag tulunghaan sa dakbayan nga gipangulohan ni Federation President Edith Flores Cabahug.

Si Umapad Barangay Kagawad Nelson Rubio kinsa mao usab ang chapter PTCA president sa Don Gerardo Ouano Memorial National High School sa barangay Opao nga gikahinabi sa Banat News miingon nga ilang supakon ang maong tinguha pinaagi sa maong resolusyon.

Dugang pa niya nga gawas sa resolusyon gipasuportahan usab kini sa mipirma sa natigom nga mga lagda gikan sa mga ginikanan ug magtutudlo sa mga tulunghaan sa dakbayan isip pagpadayag sa ilang sentimento pagsupak sa pagbuak sa Sugbo.

Si Kagawad Rubio miingon nga ang mga tinun-an sa high school sa dakbayan ila usab nga gipaapil sa pagpirma apan gibuwag sa listahan sa mga hingkod ang panuigon nga misalmot sa signature campaign ni Gobernador Gwendolyn Garcia.