Mitulis sa lending firms gikatakdang kasuhan

Gihikay na sa kapolisan ang pagpasaka og kaso batok sa duha ka dinakpang suspek sa pagpanulis sa duha ka lending firm niadtong milabay'ng Huwebes sa buntag.

Ang mga suspek mao sila si Dindo Ancero kinsa usa sa mga suspek pagtulis sa Land Bank of the Philippines-Bogo branch niadtong 2005 ug ang kauban niining nagpailang civil engineer nga si Jangen Fernandez nga taga Lagtang, Talisay.

Ang duha nadakpan diha sa dakbayan sa Mandaue niadtong Biyernes sa hapon diin sila nakuhaan og duha ka kalibre .38 nga rebolber, mga peke nga tseke nga minilyon ang kantidad, ID ni Fernandez isip interior walling contractor sa gihimong Cebu International Convention Center.

Si Ancero positibong gitumbok sa mga testigos sa A1 Finance Corporation Incorporated sa dalan Osmeña Boulevard ug Asialink Finance Corporation sa dalan Mango Avenue nga maoy mition kanila og armas atol sa hitabo.

Samtang si Fernandez wala ilha sa mga biktima, apan nakuhaan kini og usa ka kalibre .38 nga long barrel ug mga pekeng dokumentos ug tseke.

Sa pagkakaron sumala pa ni SPO1 Filomino Mendaros sa Criminal Investigation and Intelligence Branch, bugtong si Ancero ang klarong mapasakaan nila og kasong pagpanulis.

Apan base sa pamahayag sa mga kawani sa Asialink, si Fernandez makatulo na ka higayon nga naka-loan og puhunan kanila sanglit nagpaila kining usa ka contractor ug nagdala og mga rekisitos nga gikinahanglan.

Gisusi karon sa kapolisan ang mga tseke nga nagkantidad og minilyon apan nadiskubrehang pareho ra tanan og serial number ilabi na ang tseke sa Land Bank of the Philippines nga nagdala sa pangalan sa MCWD ug PCI-Equitable Bank.

Dugang sa nakuha kanila mao ang upat ka diskettes nga dunay format sa mga tseke, ID sa PRC, Mayor's Permit sa Carmen ug uban pang gituohang gamiton ni Fernandez pagpangilad sa mga lending firm.

Si Chief Inspector George Ylanan sa Vice Control Section mitug-an nga si Fernandez maoy ilang gidudahang 'planner' sa grupo pinaagi sa pag-aplay niini og mga loans sa mga lending firms gamit ang ilang mga mini nga mga dokumentos dungan sa pagpaniid sa estabilisamento.

"Si Fernandez maoy ilang planner, mangaplay siya og loan, kung makalusot ang mga dokumentos maayo, pero kung dili di nalang sad siya mamugos, pero naka-surveillance na siya sa establisamento. It is like hitting two birds in one stone ba," asoy pang Ylanan.

Niadtong Biyernes sa gabii sa pakighinabi sa Banat News sa duha, pareho silang mihimakak sa pasangil, nangangkon si Ancero nga nagpundo ra siya sa ilang balay sa Banilad tibuok adlaw niadtong Huwebes .

Samtang si Fernandez nangangkong higala niya kaniadto si Ancero nga buot magpatabang kaniya nga makatrabaho sa CICC maong nag-uban sila niadtong sila nadakpan.

Giklaro ni Supt. Melvin Gayotin nga dili iligal ang pagdakop sa duha sanglit wala maputol ang ilang hot-pursuit operation batok sa mga tulisan.