Kasong administratiba ipasaka vs 2 ka polis

Duha ka polis sa Fuente Police Station nga gikiha may labot sa pagtulis ug pagpatay nila ni Pilar Hernandez ug Wevina Pancho irekomendar nga paimbestigahan og administratiba.

Si Supt. Melvin Gayotin mitug-an sa pakighinabi sa Banat News nga ang maong imbestigasyon adto niya iduso sa buhatan sa Internal Affairs Service (IAS).

Kini aron mapapas ang pagduda nga dunay himuong "white wash" sanglit ilang mga sakop sila si SPO1 Mateo Yanson ug SPO1 Elmo Rosales.

Ang duha lakip na ang ilang police asset nga si Troy Diago gipasakaan og kasong two-counts of murder ug robbery niadtong milabay'ng adlaw.

Si Yanson maoy gitumbok nga prime suspect sa kapolisan tungod sa pagkarekober sa armas nga gigamit atol sa hitabo niadtong Septiyembre 9 diha sa buhatan mismo sa PRH Lending Investment Incorporated nga gipanag-iya sa biktimang si Hernandez.

Ang maong mga polis dili usab ipaubos sa preventive suspension apan buwagon sila og destino, si Yanson sa Service Security Group samtang si Rosales sa Mobile Patrol Group.

Matud pang Gayotin pinaagi niini mas madali ang pagpatawag kanila inig sugod na sa kaso ngadto sa korte.

Ang tulo ka gipangkiha daan nang mihimakak sa pasangil batok kanila ug gigamit lang sila aron mapadali ang kaso.

Sumala pa sa hepe sa Homicide Section nga si Inspector Erlando Metante, si Yanson maoy mihulam sa armas ni PO1 Eddiely Malata nga gipaprenda sa maong polis kang Diago.

Ang maong armas giingong gihulman usa ka adlaw sa wala pa patya ang mga biktima ug giuli kini pagkasunod adlaw ug ngadto gipasa kang Rosales.

Niadto nang Septiyembre 25 kini nabalik ngadto sa tag-iya, nasubay ang maong armas gumikan sa rehistro niini sanglit ang mga basiyong nakuha diha sa crime scene giingong mitakdo sa rekord niini.