Tinun-an naghikog

Patay na nga napalgan ang usa ka 19-anyos nga tinun-an sa nursing kinsa giingong naghikog gamit ang usa ka nylon cord nga gihigot sa iyang liog unya ang pikas tumoy niini gikutay sa beam diha sa kusina sa ilang balay niadtong Huwebes sa gabii sa Barangay Pooc dakbayan sa Talisay.

Si Cristine Bernardo, residente sa maong lugar napalgan na lang sa iyang "foster father"(ang mga polis sa Talisay wala makahibalo sa pangalan) nga nagbitay na og wala na kini maglihok.

Apan pag-abot sa grupo sa homicide section sa kapolisan sa dakbayan gitangtang na si Bernardo sa pisi ug gipahigda na diha sa sawog.

Ang patay'ng lawas ni Bernardo gidala sa Rolling Hills Funeral Parlor diha sa Banilad para sa awtopsiya pagsuta kung wala bay foul play ang maong insidente.

Ang kapolisan sa Talisay adunay mga anggulo nga gisubay sa maong insidente usa niini ang posibleng pagka-depress ni Bernardo sa iyang pag-eskwela.

Niadtong Biyernes sa hapon, usa ka Alex Magalona, 25, nga clinical instructor sa usa ka tunghaan sa nursing diin magtungha ang biktima midangop sa Homicide Section sa Cebu City Police Office ug mireklamong gihulga siya sa usa ka wala mailhing babaye diha sa ilang faculty room.

Matud pa ni SPO3 Zenaido Pastorfide nga si Magalona maoy gipasanginlang nakaingon sa paghikog sa biktima. Si Magalona sa iyang bahin mibutyag nga dunay insidente nga duna siya'y gimaymayan nga estudyante tungod kay dili kumpleto ang uniporme niini, apan wala usab niini klaroha kun si Bernardo ba ang iyang gipasabot.

"Ila daw'ng polisiya, kung dili kumpleto ang uniform dili pasudlon, murag siya daw maoy gibasol sa paghikog,"asoy pang Pastorfide.

Giingong dunay laing kauban ang maong babaye nga usa usab ka babaye nga giingong dunay dalang armas maong nahadlok si Magalona ug misumbong sa mga polis.

Ang Scene of the Crime Operation (SOCO) ug kapolisan sa Talisay mipahigayon og follow up nga imbestigasyon sa maong hitabo.