Polis naangol sa pagresponde

Usa ka polis ang naangol human kini gipusil dihang miresponde sa usa ka pagpamusil diha sa eskina sa F.Llamas ug Buhisan Road sa Punta Prinsesa ning dakbayan kagahapon sa kaadlawon.

Ang biktima mao si PO2 Richard Tagadiad, sakop sa Punta Prinsesa police station human kini matapsingi og bala diha sa iyang ulo dihang gipusil sa usa ka giilang si Jeffrey Cebedo, walay klarong address dinhi sa dakbayan apan lumad nga taga Malaubang, Ozamiz City.

Sa imbestigasyon ni SPO2 Rey Cuyos sa Homicide Section, ang grupo ni Tagadiad miresponde sa maong dapit dihang usa ka Mark Bert Ramirez,25, usa ka drayber sa traysikol ang gipuspusan og tubo, gidunggab ug gipusil ni Cebedo ug kaubang si Sherwin Abella dela Cerna,28, taga Guadalupe Village sa samang barangay.

Matud pa nga ang mga suspek miduol kang Ramirez samtang kini nagpaabot og pasahero diha sa nahisgutang dapit ug gipangayuan og kwartang ipalit og bino.

Si Ramirez midumili sa paghatag og kwarta sa mga suspek hinungdan nga nasuko ang duha ug gidagmalan kini, human malup-og si Ramirez yanong nanglakaw palayo ang duha diha sa dapit samtang gitabangan ang biktima sa mga higala pagdala sa Cebu City Medical Center.

Ang grupo ni Tagadiad uban nila ni SPO1 Rodulfo Guarin,PO3 Allan Batobalonos ug PO1 Babyboy Reales daling miresponde sa alarma ug nasugatan si Cebedo uban ang usa ka giilang Excelso Villavelez.

Apan dihang gihunongan sa mga polis kalit nga nagbuwag og panagan ang duha, si Cebedo gikatahong mipusil kang Tagadiad ug daling nakadagan gawas lang ni Villavelez nadakpan sa mga kaubanan ni Tagadiad.