Mipatay ni Esperat gipang-konbikto sa korte

Gipahamtangan og silot nga reclusion perpetua kun tibuok nga kinabuhing pagkabilanggo ni Regional Trial Court (RTC) Judge Eric Menchavez sa branch 21 ang tulo ka akusado sa pagpatay sa peryodista nga si Marlene Esperat ug pabayaron usab sila og P75 mil nga civil indemnity, P75 mil nga moral damages ug P25 mil nga exemplary damages ngadto sa pamilya sa biktima.

Sila si Estanislao Bismanos alyas "Jun", kanhi sakop sa Philippine Constabulary, Gerry Cabayag ug Randy Grecia alyas "Jeck" gikombikto sa kasong murder apan ang usa ka gikatahong dunay kalambigitan sa insidente nga si Sgt Rowie Barua sakop sa 36th Military Intelligence Company sa Philippine Army giabswelto ni Menchaves tungod sa kakuwang sa mga ebidensiya batok kaniya.

Kahinumduman nga si Esperat kanhi presidente sa Tri-Media Association sa rehiyon 12, publisher sa Midland Review ug radio broadcaster ug naila siya sa tawag nga "Madame Witness" tungod sa iyang mga media expose sa kanhi kawani sa Dapartment of Agriculture.

Niadtong 2002 adunay mga tawo ang buot mopadagit ni Esperat human siya moduso og kasong graft batok sa mga public official ug tungod usab sa iyang gibuhat gilabay og granada ang iyang balay niadtong 2003.

Si Esperat gipusil diha sulod sa iyang balay sa Tanio Subdivision, New Isabella, Tacurong City, Sultan Kudarat atol nga nanihapon uban sa iyang mga anak niadtong Marso 2005.

Si Osmeña Montaner ug Estrella Sabay, chief accountant sa Department of Agriculture sa rehiyon 12 maoy gitumbok nga nagsugo sa pagpatay ni Esperat.

Si Grecia boluntaryong mitahan sa iyang kaugalingon ni Police Chief Inspector Harrison Martinez nga bana sa iyang iyaan.

Si Grecia mitumbok sa mga address sa ubang mga akusado ug gibutyag usab niini nga gipanid-an nila si Esperat sa wala pa mahitabo ang insidente.

Gibutyag ni Grecia nga si Barua nga close-in security ni Sabay maoy mi-hire kanila.

Matud ni Grecia nga P100 mil ang tanyag nga bayad sa maong misyon ug giunhan sila og P50 mil isip pasiunang bayad ug ang laing P50 mil madawat nila human sa misyon.

Si Bismanos ug Cabayag nagkuyog pagsulod sa balay ni Esperat ug gipusil sa duha ang biktima ug si Grecia maoy nagsilbing back up.

Ang nahisgutang pasiunang bayad nga P50 mil nga gamiton sa nahisgutang operasyon gibahin sa tulo ka akusado diin P18 mil kang Cabayag, P18 mil kang Bismanos ug P14 mil kang Grecia.

Niadtong Hulyo 2005, si Bismanos, Cabayag ug Grecia mi-plea "guilty" sa gipahigayong re-arraignment sa kaso.

Niadtong Abril 2005 si Bismanos ug Barua nasikop sa usa ka mall sa Davao City ug si Cabayag didto masikop sa balay ni Bismanos.

Ang .45 kalibreng pusil ni Cabayag nga giingong gigamit sa pagpusil didto masakmit sa mga otoridad ni Kapitan Andres Diongco sa Buclad, Asuncion Davao del Norte diin si Cabayag nasugamak og aksidente sa karsada samtang nagsakay kini sa iyang motorsiklo sa maong lugar niadtong Marso 2005.

Base sa resulta sa ballistics examination nasuta nga ang nahisgutang pusil nga gipanag-iya ni Cabanag maoy gigamit sa pagpusil ngadto kang Esperat. Si Montaner ug Sabay wala madakpi ug pabiling gawasnon hangtod karon