Polis nga hubog namusil, nasikop

Hubog nga polis sa Police Regional Office (PRO-7) nga nakapusil patay sa Babag II, Lapu-Lapu sa miaging kaadlawon ug nadakpan sa panimalay nga gipuy-an sa iyang hinigugma sa Duljo, Fatima, dakbayan sa Sugbo.

Ang nadakpan mao si SPO3 Pepito Ramirez Andres, hingkod ang panuigon, taga Salvador, Punta Princesa niining dakbayan ug nadestino sa radio room sa PR0 7.

Si Fernando Priman, 35, gipusil ni SPO3 Andres sa balay sa kapuyo didto sa Star 5 Babag II, Lapu-Lapu kinsa namatay tungod sa samad pinusilan sa walang dughan.

Si SPO3 Andres gipaubos sa paraffin test sa PNP Crime Laboratory ug gitanggong karon sa detention cell sa Lapu-Lapu.

Si SPO3 Andres nadakpan sa follow up nga gihimo sa mga sakop sa Homicide Section nga gipangulohan ni Inspector Francisco Baguio.

Sa pagpakighinabi sa Banat News kang Inspector Baguio, sumala pa niini nga si SPO3 Andres ilang nadakpan pinaagi usab sa paghipos og kasayuran gikan sa videokehan sa maong lugar.

Matud pa ni Baguio nga buntag pa nga nag-inom ang maong polis ug sa pagpauli niini sakay kini sa multicab nga nagdala sa plakang GHD 370.

Nasuko si SPO3 Andres nga naalihan sa biktima ug kuyog niining silingan ang dalan nga maoy hinungdan nga namusil kini gamit ang kalibre.45.

Dugang pa ni Baguio nga sila si Eddie Tecson, Olivar Buansit ug uban pang kuyog sa inom maoy una nilang gi-pick up kinsa mao usab ang ni-guide nila sa pagsikop ni SPO3 Andres sa Duljo-Fatima.