DTI mipasidaan vs mga gimik

Gipasid-an sa gobyerno ang publiko sa dili pagpalingla nianang mga gimik sa mga tindahan nga binuang.

Si Ines Cajegas, sa Department of Trade and Industry (DTI) mihimo sa maong pasidaan nunot niining mga taho sa mga gimik-gimik sa mga tagdumala sa mga tindahan aron modaghan ang ilang kustomer ilabi na ning nagsingabot na ang pasko.

Base sa mga taho nga nadawat sa DTI, giingong may mga tindahang motanyag og mga "free gifts" o libreng gasa aron hayloon ang ilang kustomer nga mopalit sa ilang mga produkto.

Ang mga "promo girls" sa mga produkto nga ilang ipromote gipasagdan lang sa mga tagdumala sa tindahan nga wala na gani usisaha kon tinarong pa ba ang mga tanyag niini ngadto sa mga tawo.

Matud pa ni Cajegas nga may balaod nga gipatuman ang DTI sama sa Consumer Act of the PHilippines ug ang Local Government Code of 1991.

Kining maong mga balaod nagbuot nga kutob sa mga kompaniya ug mga negosyanteng gustong motanyag og mga paagi pagdani sa mga kustomer sama sa "raffle draw" ug uban pang gimik, kinahanglang may permiso gikan sa DTI.

Busa kun lapason kining maong balaod may silot nga ipahamtang ang kagamhanan batok niadtong malapason ug mao kini ang gibantayan sa DTI, matud pa ni Cajegas.

Bahin niining mga gimikgimik sa ubang mga tindahan, si Cajegas mibahad nga ipasubay nila kini sa ilang mga tawo.

Ang konseho sa siyudad pinaagi sa usa ka resolusyon misukna sa DTI paghimog lakang niining mga binuang karon sa mga tindahan nga gisagolan nag pangilad sama sa giingong "free gift" diin sa dili pa makuha ang maong free gift nga butang, papaliton una og laing produkto ang kustomer diin kon sutaon tua sa maong produkto ikarga ang presyo niadtong giingong free gift.