'Shoot order' vs Drayber: Kay midunggab sa traffic enforcer

Gimando ni Cebu City Mayor Tomas Osmeña nga ipapusil ang drayber sa PUJ nga nanunggab sa usa ka traffic enforcer dihang gidakop kini sa may dalan N. Bacalso Avenue kagahapon sa buntag.

Kini sa higayun nga magdumili ug mosukol ang drayber nga si Wenelito Econas,33, taga sitio Burlas, Lagtang dakbayan sa Talisay kinsa maoy gitumbok nga midunggab sa traffic enforcer nga si Danilo F. dela Peña, 35, taga Linao, Minglanilla. Si dela Peña nakaangkon og samad dinunggaban sa tiyan ug gitabangan sa usa ka drayber sa PUJ nga si Rotillo Pogoy kinsa nagmaneho og PUJ nga 42D ug gidala sa Cebu City Medical Center ug gibalhin sa usa ka pribadong tambalanan.

Gawas niini nitanyag pa og P50 mil nga ganti ang mayor alang niadtong makahatag og impormasyon sa suspetsado nga moresulta sa pagkasikop niini.

Apan matud ni Osmeña mahimo pang molabaw sa P50 mil ang madawat nga ganti sa informant ug sa makadakop sa suspek kon mosukol kini ug mapusilan.

Sa imbestigasyon nila ni SPO3 Zenaido Pastorfide Jr. sa Homicide Section, kasamtangang nagbantay sa trapiko si dela Peña diha sa atbang sa Cebu Institute of Technology sa buntag.

Matud pa sa biktima nga iyang nakit-an ang usa ka minibus nga nagbiyahian og Minglanilla nga may plakang GWK-982 nga mihunong diha sa "No Stopping" nga dapit.

Gikatahong gisenyasan sa biktima ang drayber nga palargahon ug dili na mokuha o ba kaha mopakanaog og pasahero sa maong dapit apan gikatahong wala panumbalinga sa suspek ang biktima.

Si dela Peña daling miduol sa sakyanan sa suspek ug giisyuhan kini og temporary operators permit (TOP) apan giingong nasuko ang suspek ngadto sa biktima ug kalit nga mibunot og talinis nga butang dayong hansak katulo ka higayon diha sa tuong ilok ug sa tuong parte sa lawas.

Ang suspek daling miikyas ug gibiyaan ang biktima lakip na ang iyang sakyanan. Si Pugoy kinsa naagian ang insidente maoy mitabang sa biktima ug gidala kini sa tambalanan.