Kini gumikan sa panaglalis karon sa mga lokal nga opisyal ug pribadong sektor labot sa pagpatuman sa maong proyekto.
Apan ang bugtong tuyo sa proyekto mao ang pag-suplay og dugang 40,000 metro kubiko nga tubig gikan sa sapa sa Luyang, Carmen ngadto na sa mga dapit nga giserbisyohan sa MCWD lakip na sa mga dagkung industriya ug kompaniya sa Sugbo nga karon nag-antus sa kakuwang sa tubig.
Subling gipadayag sa mga lokal nga opisyal sa lungsod sa Carmen nga gipanguluhan ni acting Mayor Al Silvestre Damiles nga ilang ipaambit ang ilang tubig sa ubang lugar hinungdan nga ilang suportahan ang bisan kinsa nga kontraktor nga mopatuman sa proyekto.
Ang tubig nga kuhaon mao ang nagdagayday sa sapa nga mopaingon lang sa dagat matag gutlo ug wala napahimusli sa katawhan.
Ang awhag sa mga lokal nga opisyal sa NEDA gitumong sa pagpadali sa paghikay sa mga papeles ug ang pagpili sa kontraktor nga makahatag og ubos nga presyo aron dili malangan pa ang proyekto.
Nakamugna sa kontrobersiya ang pagtumaw sa ubang interesadong grupo nga mosuplay sa tubig sa MCWD sa giingong mas barato nga presyo kaysa nahaunang kontraktor nga mao ang Ayala Corporation.
Ang NEDA miaprobar sa proyekto niadtong tuig 2004 ug ang kontrata nahingpit niadtong Mayo 2006.
Sunod nga lakang mao ang ikaduhang pag-aprobar sa NEDA ug ang Swiss Challenge diin ang mas makapabarato pa sa presyo ang makakuha sa proyekto.