Testigo mibakwi sa pamahayag

Usa sa mga testigos sa pagpanulis ug patay sa tag-iya sa lending firm diha sa dalan T.Padilla Extension sa Tejero ning dakbayan gikatahong mibakwi sa iyang pamahayag.

Ang testigo nga usa ka police asset nga si Troy Diago diha sa Fuente Police Station gikatahong mibakwi na sa iyang pamahayag ug mipasangil sa Vice Control Section pinanguluhan ni Chief Inspector George Ylanan ug mga polis.

Matud pa niini nga niadtong Oktubre 2, 2006, gidakop ug giposasan dayon pugsanon siyang gidala ni Ylanan sa iyang buhatan tungod sa pagkalambigit niini sa kamatayon ni Pilar Hernandez ug Wevina Pancho sa PRH Lending Investment Incorporated niadtong Septembre 9.

Sumala pa niya pugsanon siyang gipahatag og pamahayag batok sa duha ka polis nga sila si SPO1 Elmos Rosales ug SPO1 Mateo Franco Yanson sa Fuente Police station may labot sa krimen.

Giingong gipasanginlan sa VCS ug sa Homicide Section si Yanson nga maoy mihulam sa armas nga gipabaligya kaniya sa usa ka babayeng polis niadtong Septembre 8, ug gibalik kini niadto nang Septembre 10.

Samtang si Rosales naapil sa ikaduhang gipapirmahang affidavit kaniya isip maoy gipasahan sa kalibre 9 millimeter nga armas niadtong Septembre 10.

Matud pa sa asset nga dili tinuod ang gilagdaan niyang pamahayag batok sa duha ka polis ug pugsanon siyang gipahimo niini atubangan sa usa ka gikatahong abogado sa City Hall nga usa ka Atty. Ponce.



Si Supt. Melvin Gayotin nagkanayon nga ang pagbakwi sa asset mamahimong mosumbalik kaniya, sanglit ang pamahayag niya giabagan og abogado.

"Iya na na, he was not put under pressure paghatag niya og statement, ang pag-recant niya it can be used against him, because he issued that in the presence of a lawyer,"asoy pang Gayotin.

Matud pang Gayotin mamahimong maapil siya sa kaso may labot sa krimen.

Samtang si Labra nagkanayon nga dili mapiang ang kaso tungod sa pagbakwi sa testigo sanglit ang tanang ebidensya nagtumbok ngadto sa polis ug wala sila magsalig sa maong asset.

Matud pang Labra dunay attempt sa witness nga i -cover-up ang imbestigasyon aron maadto sa ubang anggulo, apan duna say testigo nga nakapalig-on hinuon sa una nilang teyoriya.

Ang kaso gikatakda nang ipasaka bisan unsang orasa karong adlawa tungod kay niadtong mga miaging adlaw dunay mga kakulian nga nakapausab sa pagpangandam sa mga dokumentos.

Samtang ang bana ni Pilar nga si Jacob sa pakighinabi sa Banat News mipadayag sa iyang kalipay bisan sa kalangay sa dagan sa imbestigasyon.