Volunteer gilabay granada

Namatay ang usa ka sakop sa civilian volunteer organization ug naangol usab ang 8 anyos nga anak niining babaye uban sa laing duha pa ka sakop sa pamilya human mabiktima sa pagpamusil ug pagpanglabay og granada.

Nahitabo kini alas 11 pasado ang takna sa miaging gabii sa Cantuod, Balamban atol usab sa pagsaulog sa kapistahan ni Saint Francis de Asisi, ang patron sa maong lungsod.

Ang namatay mao si Agosto Togonon, 45, minyo, nagpuyo sa maong dapit ug crime volunteer sa maong lungsod.

Naangol ang duha ka mga anak niining sila si Rhea Mea, 8, Ronnie, 24, ug lakip na usab sa kapuyo nga si Jessica Senerio, 24 nga pulos nagpuyo sa maong dapit.

Si PO3 Celso Diaz sa kapolisan sa nahisgotang lungsod nga gikahinabi sa Banat News miingon nga gikan pa sa lungsod ang amahan nga si Agosto sakay sa motorsiklo.

Sa paghidangat sa ilang panimalay sa maong dapit kalit lamang kining gisugat sa wala pa mailhing tawo ug kalit lang gilabay og granada.

Dugang pa niya nga ilang gituohan nga buhi pa ang amahan nga si Agosto apan giduol kini sa mamumuno ug gitiwasan sa pagpusil nga maoy nakaingon sa kamatayon niini.

Si PO2 Cesar Climaco nga maoy nag-imbestigar sa maong insidente ang padayon pa nga naghimo og pakisusi sa maong hitabo.

Matud pa ni PO3 Diaz nga ang mga naangol ang dali nga gidala sa Balamban District Hospital ug gibalhin kini sa tambalanan sa dakbayan sa Sugbo.