2 ka lending firm giigo sud 20 mins

Duha ka insidente sa pagpanulis sa duha ka lending firms sulod lang sa 20 minutos nga giingong binuhatan sa usa ra ka grupo diha sa dalan Jones Avenue ug Mango Avenue ang nahitabo kagahapon sa buntag.

Ang pagpanulis nahitabo usa ka adlaw human ikumpirmar sa kapolisan ang nangabot nga grupo sa mga tulisan gikan sa Ozamiz City, apan ang mga suspek nagpailang sila mga vigilante.

Daw giinsulto pa gyud sa mga suspek ang kapolisan tungod kay ang mga establisamentong gitulis dili layo gikan sa Police Regional Office 7 ug Cebu City Police Office.

Ang unang gitulis alas 11:10 sa buntag mao ang A1 Micro Finance Incorporated nga nahimutang sa dalan Jones Avenue dili layo sa buhatan sa PRO7 ug ang sunod nga gitulis mao ang Asialink Finance Corporation diha sa Mango Avenue duha ka minutos nga lakaw gikan sa CCPO.

Si Supt. Melvin Gayotin ang direktor sa kapolisan nagkanayon ila nang gisubay kung ang mga suspek mao ba ang grupong gitumbok nga nangabot gikan sa Mindanao.

Duha ka mga lalaking gibana-banang may gitas-ong 5'7 ug 5'8, ang usa nagsuot og kolor brown ug nag-shades samtang ang usa kolor puti ug parehong armado og kalibre .38 ug kalibre 45 pistola.

Sa A1 Micro Finance Incorporated, dunay lock diha sa sulod ang maong buhatan apan gikatahong ang usa sa mga suspek nagpakita og kwarta diha sa gawas nga sa ilang pagtuo mobayad maong giablihan kini sa mga kawani.

Diha-diha mideklarar og tulis ang duha ka suspek ug gipangsulod sa kasilyas ang tulo ka kawani ug duha ka kustomer nga sila si Shane Maramara (cashier), Raymund Moscozo (manager), Rio Calayca (staff) ug mga kliyenteng sila si Lorna Masero ug Anabelle Vargas.

Si Pablo Labra sa Criminal Investigation and Detection Group nagkanayon nga gipangtiunan og mga armas ang mga biktima ug gipasulod sa kasilyas dayong gipanguha ang kwartang nagkantidad og P13 mil, tulo ka cellphone, duha ka singsing, personal nga kwarta ni Moscozo nga P5 mil ug P2500 ni Vargas.

Samtang ang mga polis nagkara-kara pagresponde sa maong dapit, gisunod og tulis pagka-alas 11:30 ang Asialink, sa susamang paagi nga nagpaila silang mga vigilante ngadto sa mga kawani.

Gikuha sa mga suspek ang gibana-banang P150 mil sa Asialink nga gisulod sa upat ka cashboxes ug gipasulod gihapon ang siyam ka mga kawani ug usa ka lalaking kustomer sa kasilyas.

Si Dondon Reyes usa sa mga kliyente nga mosulod unta sa Asialink miingon nga mismong ang usa sa mga suspek ang miabli kaniya ug giingnan siyang "ayaw lang kabalaka part kay mga vigilante mi."

Una pa moikyas ang mga suspek, giputol nila ang linya sa telepono. Ang manager sa Asialink nga si Mike Gentoliso kinsa mikanaog gikan sa ikaduhang andana nahibulong kay mingaw sa silong.

Dihang mangasilyas unta siya, diha nalang niya makit-i ang mga sakop sa maong kasilyas nga nangalisang, apan wala na diha ang mga suspek.

"The descriptions of the persons who rob A1 have the same descriptions who rob Asialink," asoy pang Labra.

Ang maong mga establisamento parehong walay kaugalingong gwardiya ug nagsalig lang sa mga gwardiya sa edipisyong ilang giabangan.