Kini human nasayri nga P200 ra ang nadawat sa mga ginikanan sa bata gikan sa P10,000 nga hinabang sa lokal nga kagamhanan.
Ang reklamo gipadangat nilang Sta. Rita barangay kapitan Camilo Dacaldacal ug konsehal Hercules Tampos ngadto sa konseho sa lungsod batok ni municipal social welfare officer Zenaida Cortes atol sa sesyon niadtong Agosto 28, 2006.
Ang hinabang alang unta sa pamilya sa gipatay nga si Al Quirante Miano nga taga barangay New Bago, Asturias.
Ang nahisgutang mga opisyal sa barangay nagpatabang sa konseho sa lungsod sa pagpaimbestigar kang Cortes.
Matud pa ni Tampos nga ang inahan sa bata nga si Virginia Miano maoy nikuyog kang Cortes sa pagpa-ilis sa tseke sa Land Bank, P. del Rosario branch sa dakbayan sa Sugbo.
Si Cortes ang niatubang sa teller sa bangko ug nikuha sa kwarta dayun gitunol ngadto kang Virginia ang P200.
Gipatawag na sa konseho sa lungsod si Cortes apan nagdumili kini sa pag-atubang sa imbestigasyon sa rason nga wala siya kadawat og mando gikan sa mayor.
Giangkon sa mga konsehal sa lungsod nga maglisud sila pagpatawag kang Cortes sanglit suod kini ni Mayor Letecia Orosco.
Kini ang hinungdan nga giduso sa konseho pinaagi sa ilang resolusyon ang reklamo ngadto sa hunta probinsiyal sa Sugbo aron ang hingtungdang komitiba ang mohimo sa imbestigasyon.