Negosyante gitulis, gipatay

Negosyante sa sitio Oling, barangay Tabok, Danao gitulis ug gipatay niadtong Domingo sa iyang katabang nga lalaki .

Ang biktima mao si Elmer Lato Enriquez, 32, minyo ug ang suspetsadong nagtulis ug nagpatay niini ang iyang boy nga si Joel Seno, hingkod ang panuigon, ulitawo, lumad nga taga Puerto, Mati, Cagayan de Oro.

Si SPO3 Edgar Gomez sa kapolisan sa maong dakbayan nga gikahinabi sa Banat News miingon nga ang biktima kinsa nakabaton og daghang samad ang napalgan na lamang sa iyang balay nga nagbuy-od nga naligo sa kaugalingon niining dugo.

Ang bayaw niining babaye nga si Madona Capol nga nagpuyo sa maong dapit maoy unang nakakaplag sa patay'ng lawas sa biktima.

Si Supt. Larsan Dechino, hepe sa kapolisan sa Danao kinsa maoy nangulo sa pagtubag sa maong alarma mipagukod sa suspetsado.

Naabtan ni Supt. Dechino ang suspetsado sa barangay Bagalnga, Compostela kinsa nangandam na unta alang sa pagbiya sa maong dapit.

Dugang pa ni SPO3 Gomez nga wala pa nila matino gikan sa pamilya sa biktima ang kantidad sa salapi ug mga butang nga nasakiyo sa suspetsado sanglit nagpadayon pa ang imbestigasyon nga ilang gihimo.